Paglalakbay sa bingit

PAGLALAKBAY SA BINGIT

lumulutang yaring diwa

sa langit ng pang-unawa

ang nasa dambana'y tula

ang nasa dibdib ay luha

nilalakbay bawat bingit

ng kahapong di maukit

mga planong inuugit

sa puso'y inilalapit

ang tula'y nakabubusog

sa diwa kong nayuyugyog

ngunit nagkalasog-lasog

nang ilang ulit nauntog

wala man sa toreng garing

sa pagkatha'y buong giting

na ang madla'y ginigising

sa mahabang pagkahimbing

- gregoriovbituinjr.

04.02.2025

* kinatha sa ika-237 kaarawan ng makatang Francisco Balagtas

Ngayong Araw ni Balagtas, nais kong magpasalamat

NGAYONG ARAW NI BALAGTAS, NAIS KONG MAGPASALAMAT

ngayong Araw ni Balagtas, / nais kong magpasalamat

sa lahat ng mga tulong / sa oras ng kalituhan

nang maospital si misis / sa matinding karamdaman

pinaaabot ko'y taos / sa pusong pasasalamat

hindi ko man matularan / ang idolo kong makata

subalit para sa akin, / bawat kathang tula'y tulay

tungo sa pakikibakang / sa tuwina'y naninilay

lalo't isyu't paksa iyon / ng manggagawa't dalita

di pa mabuti si misis / bagamat pumapasok na

sa trabaho bilang social / worker sa kanilang opis

subalit ayon sa doktor, / rare case ang kaso ni misis

kaya pag-uwi ako'y nars, / at di pabaya sa kanya

kwarenta'y nwebeng araw nga / kami noon sa ospital

may tumulong, may inutang, / may isinanlang titulo

presyong tatlong milyong piso'y / di ko alam papaano

unti-unting babayaran, / presyong nakatitigagal

sa dalawang NGO nga'y / sinubukan kong mag-aplay

subalit di pa matanggap / ang tibak na laging kapos

ngayong Araw ni Balagtas, / pasasalamat ko'y taos

sa mga pusong dakila / sa tinulong nilang tunay

- gregoriovbituinjr.

04.02.2025

Nasisilaw sa ilaw

NASISILAW SA ILAW

nagtakip si alaga ng kamay

habang natutulog ng mahimbing

marahil nasisilaw sa ilaw

kaya kamay ay ipinantabing

mamaya, ako'y matutulog din

at ang ilaw ay io-off ko lang

isasara lang, di papatayin

mahirap ang salita ng tokhang

buti tulog ngayon si alaga

pagkat gabi ang kanyang trabaho

hanggang madaling araw gising nga

upang daga'y hulihing totoo

- gregoriovbituinjr.

04.01.2025

* mapapanood ang bidyo sa kawing na: https://www.facebook.com/share/v/1LAWQbT1c8/ 

Ang uod ay isang paruparo

ANG UOD AY ISANG PARUPARO

And just what the caterpillar thought her life was over, she began to fly. ~ Chuang Tzu

kaygandang talinghaga'y nabatid

na magandang payo sa sinumang

nahihirapan at nabubulid

sa dusang tila di makayanan

sino kaya ang nagsabi niyon

ng talinghagang tagos sa puso

si Chuang Tzu nang unang panahon

at isa sa Taoismo'y nagtayo

akala ng uod mamamatay

siya paglabas sa nakabalot

sa katawan, at nang magkamalay

ay naging paruparo ang uod

nakalipad na patungong langit

sa mga kampupot bumababa

noon ay laging minamaliit

ngayon kayganda, kamangha-mangha

tulad din ng ating suliranin

na animo'y di na malulutas

may buhay pa palang haharapin

tungo sa isang magandang bukas

- gregoriovbituinjr.

04.01.2025

* larawan mula sa google

Noli Me "Tangina"

NOLI ME "TANGINA"

si Rizal daw ang idolo ng ama

na hilig magtungayaw o magmura

inakda raw ay Noli Me "Tangina"

komiks na patama, kunwari'y kwela

sa biro, ako na lang ay natawa

iba rin talaga si Al Pedroche

na sinulat ay iba't ibang siste

nasa diwa'y gagawan ng diskarte

lalo't pasasaringan ay salbahe

isusulat anuman ang mangyari

meron bang El "Filibustanginamo"

sunod sa Noli Me "Tangina" nito

kawawa naman ang akda ni Lolo 

Pepe dahil sa biruang ganito

- gregoriovbituinjr.

04.01.2025

* tula batay sa komiks sa unang pahina ng Pilipino Star Ngayon, Marso 31, 2025

Lungad

LUNGAD

Labingtatlo Pahalang: Pagsuka ng sanggol

anim na titik, at ang lumabas na sagot:

LUNGAD, salitang ngayon ko lamang nasapol

bago lang sa akin ang katagang sumulpot

unang araw ng Abril, salita'y bumungad

madaling araw nang krosword ay masagutan

dyaryo'y kahapon pa, ngayon lamang nalantad

sa krosword ang bagong salitang kakaiba

sa wikang Ingles, infant reflux pala ito

iba sa suka, sapagkat kusang lalabas

sa bibig yaong gatas matapos sumuso

na karaniwan lang, ayon sa mga pantas

dagdag na salita itong magagamit din

sa pagkatha ng kwento, tula, at sanaysay

tila baga nalasap ay bagong pagkain

kaya bokabularyo'y nagiging makulay

- gregoriovbituinjr.

04.01.2025

* palaisipan mula sa pahayagang Bulgar, Marso 31, 2025, pahina 11

* https://ph.theasianparent.com/lungad 

* https://www.facebook.com/UnabellaMC/posts/madalas-bang-lumungad-si-baby-ang-paglungad-ng-sanggol-ay-madalas-na-ikinababaha/2355653711349118/